સુરેશ દલાલનું લખાણ

 ડોક.સુરેશ દલાલનું લખાણ છે.

૧ --તુલસીનાં સહસ્રપાન 

      ને વચ્ચે લાલ ગુલાબ 

      જુઓ,મારા સાહ્યબાનો રુઆબ.

૨--મારે હાથે હું જ ચડાવું 

     તુલસી.

    પૂજા હોય ઉછીની નહીં.

    હું જ આરતી ગાઉં 

    ને સાંભળનારો વિષ્ણુ .

૩--વિષ્ણુને પામવા હોય તો   

     થવું માત્ર વિષ્ણુપ્રિયા 

     આટલું જ સત્ય અને એ જ 

     સત્યનારાયણ ની કથા.

૪--મેં 

    મારી ભીતર 

    ઉભું કર્યું એક વૃક્ષ.

    અંધકારને પૂરેપૂરો જીરવ્યો

    જઈને આકંઠ પીધો 

    હવે હું એની છાયામાં 

    પ્રકાશનું સ્વાગત 

    કરું છું.

    પૂર્ણ મૌનથી.

૫--ફૂલના આસન પર બેસીને 

     ઝાકળ 

     સુર્યની પ્રાર્થના કરે છે.

૬--મારી કને 

    આવવામાં તું આટલો 

    વિલંબ કેમ કરે છે?

    મારી આંખ 

   તારાં આવવાના રસ્તા પર છે 

   અને મારી નજર 

   ઘડિયાળના કાંટા પર.

૭--મને હજી સુધી 

    ખબર નથી પડતી 

    કે તું મને ચાહે છે કે નહીં?

   "હા " કે "ના"નો 

    કોઈ સંકેત તો આપ.

    હું ક્યાં લગી 

    અટકળ પર જીવ્યા કરું?

૮--હું તને ચાહું છું 

     એ વાત મેં તને 

    કહ્યા વિના 

    કરી દીધી છે,

    પણ તારા અભણ કાનને 

    કેમ કશું 

   સંભળાતુ નથી?