દિલનું નજરાણું લાવી છું ચરણે ધરવા
પિયુ,તમે તો પ્યારની હડતાલ પાડી છે.
સુંદર તન્હાઈમાં ,લીધી અંગડાઈ નજરે પડવા
પિયુ,તમે તો નજર્યુંને નીચી ઢાળી છે .
પવનની પાંદડીએ બેસી ઝાંઝર ઝૂલી રણકે છે
પિયુ ,તમે તો સુણવાની હડતાલ પાડી છે.
સર સર સાડી સરકે ,પાલવના મોર ટહુકે છે
પિયુ ,તમે તો મુખ ફેરવી મુજને ટાળી છે .
નાશાદી વિંટળાઈ વળી છે,હૃદય માંડ્યું છે રડવા
પિયુ તમે તો તટસ્થ કો' મુનિની દશા સાધી છે .
હૈયું હિબકે ચડ્યું ,ને તમન્ના હારી ગઈ
પિયુ તમે તો નિર્વિકારી થવાની ઠાની લીધી છે .
બેલા
૪-૪-૧૯૭૫