હું તો વિષ્ણુના કૃષ્ણાવતારમાં પ્રીતિ ધરાવનાર અને એને મળવા ઉત્સુકજીવી છું; પરંતુ આ કાવ્યમાં શ્રી રામનો ઉલ્લેખ કર્યો છે એની પાછળ કારણ છે.મારે એમની પાસે પહેલાં જવું છે.મારા મનમાં જે પ્રશ્નો છે તે પૂછવા છે. શંકાનું નિવારણ કરવું છે.મારે મારા શામળાને સંશયાત્મક ચિત્ત સાથે નથી મળવું। એને તો નિર્ભેળ,નિર્મળ શુદ્ધ પ્રેમ સાથે ભેટવું છે।
પ્રશ્નો છે ;શ્રી રામ માટે। શા માટે ? શા માટે ? એમણે પત્નીની અગ્નિ-પરીક્ષા જાહેરમાં લીધી?--ચારિત્ર્ય શુદ્ધતાની ખાતરી માટે? કોને ખાત્રી કરાવવી હતી ? તેઓએ જ તો સીતાને ગુપ્તપણે સૂચવ્યું હતું ! અગ્નિમાં સંતાઈને ,છાયા રૂપે બહાર આવવા ?! સીતાજીનું હરણ થયું તે પહેલા ?! તો પછી એમ જ ગુપ્ત રીતે શા માટે પાછાં ન બોલાવ્યા ? શા માટે એમણે આ ચારિત્ર્ય શુદ્ધિનું નાટક કરી; સ્ત્રીત્વનું અપમાન કરી; આને અનુસરી પ્રથા બનાવવાનું કારણ પુરુષોને આપ્યું ?! કોઈ પણ પુરુષ શ્રી રામની જેમ એક પત્નીવ્રત ધારી નથી, તો પછી પુરુષો , સ્ત્રીઓના એક પતિવ્રત માટે આટલો આગ્રહ રાખે એવું આ ઘૃણિત દ્રષ્ટાન્ત શા માટે ?! આ દુષ્ટ દાખલાના સહારે પુરુષ રાક્ષસોએ ,પત્ની ઉપર જ્યારે ને ત્યારે ચારિત્ર્ય ખંડનનો આક્ષેપ મૂકી સ્ત્રીને સતાવવાનો ધર્મ બનાવી લીધો છે.! ગમેતેવો વ્યભિચારી પુરુષ પણ પત્ની ઉપર શક કરી એના સ્ત્રીત્વનું અપમાન કરી શકે ! !
એ જ રીતે ,ધોબીએ ,એ જ જમાનામાં ;પત્નીને (સત્ય જાણ્યા વિના ) કહી દીધું કે પોતે રામ નથી કે રાત્રી બહાર ગાળીને આવેલી પત્નીને ઘરમાં રાખું ! વાહ ! તો પછી પેલી અગ્નિ પરીક્ષાનું શું મહત્વ ?! આમ આરોપ તો શ્રી રામ ઉપર પણ હતો; તો , રામે ,પોતે રાજા થવા યોગ્ય નથી એ વલણ લઈને રાજ્ત્યાગ કેમ ના કર્યો ? એમના રાજ્યધર્મે પત્નીનો ત્યાગ કરવાનું કેમ સૂચવ્યું ? એમણે એમના ગુરુ સાથે વિમર્શ કર્યો હતો ? ધોબીની વાત સાંભળીને પત્નીને કાઢી મુકવાના વિચારને પુષ્ટિ આપી ? ! ! સીતાનો અને તે પણ એમને જણાવ્યા સિવાય -અંધારામાં રાખીને -ત્યાગ કર્યો ! ! આમાં પણ પુરુષોને જ સ્વાયત્તતા આપી દીધી ? ! ! શા માટે ?
બંન્ને પ્રસંગોમાં સ્ત્રીનું જ અપમાન ? ! આને લીધે પુરુષો સ્ત્રી ઉપર અત્યાચાર કરતાં થઇ ગયા છે. બધું જ એમનું જ ધાર્યું થવું જોઈએ નહીં તો , સ્ત્રીના પિયરસન્યાસ ,શરીર તથા આત્મ સમર્પણ , સાસરીનાં બધા જ સભ્યોનો સ્વીકાર ,સેવા ,આદર , બધું જ નક્કામું ! ! ! ? સ્ત્રીએ જીવન વ્હેણ જ બદલી નાખગ્યું હોય ,પણ કશાની ય કદર નહીં ? ! ! એક માત્ર પોતાની જીદ્દ અને સંદેહ આગળ ? ! આ સબક શીખ્યા, પુરુષો રામાયણમાંથી ! ! ! વાહ ! પોતે રામની જેમ એકપત્નીવ્રત નહીં રાખવું , ન કુટુંબ ભાવના નિભાવવી ,ના પોતાના હક્કનો ત્યાગ કરી વડીલની આજ્ઞા માનવી છતાં , રામે જે બે સિતમ કર્યાં તે ,પોતે વ્યભિચારી બનીને પણ ચાલુ રાખ્યા ! ! !
મને લાગે છે કે આ ગ્રંથ લખનાર પણ પુરુષ હતા તેથી જ તેઓને આ લખવામાં પોતે સ્ત્રીત્વનું અને સ્ત્રીનું અપમાન કરે છે તે સમજાયું પણ નહીં હોય ! ભાગવત લખનારે પણ મહાભારત અને ગીતા લખ્યાછે। એ પણ પુરુષ જ હતા ! ભગવતમાં પણ ઘણી ય જગ્યાએ સ્ત્રીને નીચી દર્શાવી છે। સ્ત્રી સંગનો ત્યાગ કરવા જણાવ્યું છે. કારણ શું? તો ;;સ્ત્રી પુરુષના ચારિત્ર્યને નબળું પાડે છે ! ! ! વાહ ! વાહ !! પુરુષોના નબળા અને ચંચળ ચિત્તનો દોષ ના દેખાયો ! ? ! પૂરુષ એવા કેવા નિર્બળ મનવાળા કે સ્ત્રીને જોઈને ચળી જાય ? હેં ? ! ! સ્ત્રીના દામન ઉપર હાથ નાખવાની શરૂઆત તો પુરુષો જ કરે છે ! સ્ત્રી કદી પહેલ કરતી નથી. આમન્યા ને લાજ એ સ્ત્રીની આંતર-ગ્રંથિ છે ;એને છોડાવવા નાર પુરુષો છે ;છતાં આક્ષેપ સ્ત્રીઓ ઉપર ? ! !
મહાભારતમાં તો સ્ત્રીને જુગારના દાવમાં મૂકી દીધી ! ! જાણે એ પણ કોઈ વસ્તુ હોય ! એનું ચીર હરણ કરાવ્યું ! પોતાના અપમાનનો બદલો લેવાની આ કઈ જાતની વૃત્તિ ? ! કથાકાર પુરુષ હતા માટે એમણે આ વિકૃત વૃત્તિ લખી।
આ બધા જ પુરુષ પ્રધાન દ્રષ્ટાતો વિષે મારે પૂછવું છે ,અને એમાં ય ખાસ તો શ્રી રામને જ ; કારણ એમના જ બે દ્રષાન્ટોને કારણે પુરુષ-પશુ આટલો વિફર્યો છે. માટે જ મારે મરીને પહેલા શ્રી રામ પાસે જવું છે। અને પછી મારા પ્રિય શામળા પાસે; જેના સાંનિધ્ય માટે વલખું છું।
હું જાણું છું ;મારું આ દ્રષ્ટિ બિંદુ ઘણાય ને ખોટું લાગશે, અધૂરું જ્ઞાન લાગશે , છતાં મેં મારી વિચારધારા અહીં રજૂ કરી છે। મને જે મનમાં વસ્યું તે લખ્યું છે,કોઈક મનોવૈજ્ઞાનિકે સૂચવ્યું છે કે મનમાં આવતાં વિચારોને તમને યોગ્ય લાગે તે રીતે બહાર કાઢવા ;તેથી મન શાંત થાય છે -વિવહળતા ઘટે છે.
અસ્તુ
બેલા 8 જાનુરી 2019 11.00 યુ.એસ.એ.
