ઝંખના

-----ઝંખના આવી ક્યાંથી ? કોણ છે તેની જનની ? 

-----વિચારોના ઊંધા વ્હેણે , વહી , મનની નદી ! 

-----મૂળ મળ્યું , તો જાણ્યું , ઈચ્છા તેની જનની ;

-----ઈચ્છાથી ફૂટી અપેક્ષા , ને , ખીલી , આકાંક્ષાની કળી .

-----ફરી વળી આકાશે આકાંક્ષા ,ભરી, ખેવના-સુરભિ  ,

-----નભને તોરણિયે ખેવનાએ , ઝંખનાને બાંધી ;

-----ખેવના ઝંખનાને ભટેવા , રહે , પાંખ ફફડાવી ,

-----પ્રયત્નોના ચકરાવા અંતે પીધી , ઝંખનાં-તૃપ્તિની પ્યાલી ! 

-----આવી ઝંખનામાં માનવી રહેતો રાચી ,

-----"બેલા" છોડી ,રાચે ,એ ઝંખનાની સવારી ! 

                                                   12\12\2020 

                                                         12.20.પી.એમ. 

 

તો , આમ ઝંખનાનું મૂળ ઈચ્છા છે ,અને ઝંખના ,એ ઈચ્છાનું ઉત્તુંગ શિખર છે .ઇચ્છામાંથી અપેક્ષા ,એમાંથી આકાંક્ષા અને એ ધ્યેય સિદ્ધ કરવાની ખેવના અંતે ઝંખનામાં પરિવર્તન પામે છે .આપણે 2 દાખલા લઈએ . આપણા સૌની જાણીતી રમત , ક્રિકેટનો , અને , બીજો , માઉન્ટ એવરેસ્ટના શિખરને સર કરવાનો . ભારતના ક્રિકેટ જગતમાં , પટૌડી , ગાવસ્કર , કપિલ દેવ , તેંડુલકર જેવાં  મહાનુભાવોના નામ આવે .તેઓએ બચપણમાં રમવાનું શરૂ કર્યું હશે ત્યારે ,વિખ્યાત ક્રિકેટર થવાની ઈચ્છા સાથે સપના જોયાં હશે . ધીરે ધીરે જેમ જેમ સફળતાની સીડી ચડતાં  ગયાં તેમ તેમ એ ઈચ્છા પણ પગથિયાં ચડતી ગઈ અને ઝંખનામાં પરિણમી હશે . એ મંઝિલે પહોંચવા તેઓએ જે તનતોડ અને મનતોડ મહેનત-પ્રયત્નો કર્યાં , તે તેઓની જીવન કહાણીમાંથી મળે છે. 

    હિમાલયના ઉચ્ચતમ શિખર વિષે વાત કરીયે , તો , તાજો જ દાખલો છે ; અરૂણિમા સિંહાનો .દુનિયાના કેટલાં  ય શિખરો સર કર્યાં  ,અને જ્યારે એવરેસ્ટ માટે સંકલ્પ કર્યો ---- જે દરેક પર્વતારોહકની ઝંખના હોય છે ---- ત્યારે , અકસ્માતમાં એક પગ ગુમાવવો પડ્યો ; છતાં , તેઓએ પર્વતારોહણ કર્યું અને એ સંઘર્ષ પર કરી ગયા ! અને જીત્યાં ! ! ધારેલું  શિખર સર કર્યું . 

    આ થઇ ,સકારાત્મક ,ભૌતિક ઝંખના-મહેચ્છાની વાત . આધ્યાત્મિક  સકારાત્મક  ઝંખનાનો પુરાવો છે ; મીરાંબાઈનું જીવન ! કૃષ્ણ-મિલનની એમની ઝંખના કેટલી તીવ્ર હતી અને તે માટે તેમણે  કેટલાં દુ:ખો સહયાં , અને અંતે એ ઝંખના કૃષ્ણ મિલન સાથે પૂર્ણ થઇ અને તેઓ વિલીન થયાં , આ આપણે સૌ જાણીયે છીએ . 

       નકારાત્મક ઝંખનાની વાત કરીયે તો , કેટલાંક એવી ઝંખના રાખતાં  હોય છે કે , તેમના પ્રતિસ્પર્ધી ---પછી તે વ્યાપારમાં હોય , કલાક્ષેત્રમાં હોય ,રાજકારણમાં કે અન્ય કોઈ પણ ક્ષેત્રમાં હોય ,---એને પછાડી આગળ વધી જવું . અને એને માટે યેન કેન પ્રકારેણ યુક્તિ પ્રયુક્તિ યોજે . આ થઇ નકારાત્મક ઈચ્છાથી ઉત્તપન્ન  થયેલી ઝંખના . દુર્યોધન આ નકારાત્મક ઝંખનાનું ઉત્તમ  પ્રતીક  છે .જેણે  , વિશ્વનું પહેલા મહાયુદ્ધનું સર્જન કર્યું ! નકારાત્મક ઝંખનાની આવી હદ પણ હોય છે . 

      ઝંખના સકારાત્મક કે નકારાત્મક ઉદ્દભવવી ,  તે , માનવીના સ્વભાવ અને પ્રકૃતિ દત્ત ગુણો ઉપર આધાર 

 રાખે છે . સમય મર્યાદા ને લીધે ઝંખના વિષે આટલું કહી વિરમું છું. 

   વાચકમના સર્વે સભ્યોને રિચમોન્ડ વર્જિનિયા યુ એસ  વીરબાળાના  સ્નેહ-સ્મરણ .

                                                                                                         15\12\2020