નોરતું

નવલાં નોરતાના દિન તો આવિયા હો રાજ ,

રુડે ગરબે રમવાને અમે નીસર્યા રે લોલ .

માતાજીની ચુંદડી લાલ લાવીયા હો રાજ ,

બહુચરમાને ચુંદડી સોહાય છે રે લોલ .

ભાલે તે ટીલડી ટમકે હો રાજ ,

નાકે નથવેસર ઝૂલતી રે લોલ .

કાનનાં કુંડળ ઝળક્યાં હો રાજ ,

આંગળીએ દસે વેઢ  ચમક્યાં રે લોલ .

કેડે કંદોરો અતિ શોભતો હો રાજ ,

પગનાં પાયલ રુમઝુમ  રણક્યાં રે લોલ .

માતાજી તો સોહે અપરંપાર હો રાજ ,

"બેલા"સંગ ઘણાં ગરબે ઘૂમ્યાં રે લોલ .

        *    *    *    *    *    *    *

                      સાખી 

હે ----ધ્રબ ધ્રબ ધ્રબ ધ્રબ ઢોલ ધબૂક્યા 

 ને નગારે પડિયા---ઘા --વ 

હે છુમ છુમ છુમ છુમ નાચંતા

મારી બહુચરબાળી ગાય 

હે મારી અંબે માડી ગાય 

હે મારી પાવાવાળી ગાય .

હે હિંગળોક ઉડે ને ઉડે ગુલાલ 

ઉડે કુમ કુમ થા--ળ,

હે બહુચર જોડે રમતાં રમતાં 

"બેલા" પગલી થા--ય ;

હો ઓલી બેલા પગલી થાય .

          ઘોડો ખુંદવો 

ખમ્મા ખમ્મા તને માવલડી 

આશિષ દેનારી માત .

ચરણે તવ શીશ ઝુકાવું ,

આશા પૂરનારી  માત .!

બેલા\૧૨\૯\૧૯૯૮\૧૨.૦૦ બપોર